နေပြည်တော် ဧပြီ ၃ – ၂၀၂၆
KKL(VOM)
ဒီကနေ့ ပြည်ထောင်စုလွှတ်တော်အစည်းအဝေးမှာပြုလုပ်တဲ့ နိုင်ငံတော်သမ္မတရွေးချယ်ပွဲမှာ နိုင်ငံတော် သမ္မတအဖြစ် ဗိုလ်ချုပ်မှူးကြီးမင်းအောင်လှိုင်ကို ရွေးချယ်တင်မြှေက်ခဲ့ကြပါတယ်။
နိုင်ငံတော်ရဲ့ဒုတိယသမ္မတ ၁ အဖြစ် ဦးညိုစော
နိုင်ငံတော်ဒုတိယသမ္မတ ၂ အဖြစ်နန်းနီနီအေးတို့ကိုရွေးချယ်တင်မြှေက်ခဲ့ကြပါတယ်။
ပြည်ထောင်စုလွှတ်တော်က မဲလက်မှတ်နဲ့လျှို့ဝှက်ဆန္ဒမဲပေးတဲ့စနစ်နဲ့ ဆောင်ရွက်ခဲ့တာဖြစ်ပြီး သမ္မတအဖြစ် ရွေးချယ်ခံခဲ့ရတဲ့ ယာယီသမ္မတ ဗိုလ်ချုပ်မှူးကြီးမင်းအောင်လှိုင်ဟာ ပြည်ထောင်စုလွှတ်တော် ကိုယ်စားလှယ် ၅၈၄ ယောက် တက်ရောက်တဲ့ထဲက ဆန္ဒမဲ ၄၂၉ ရရှိပြီး နိုင်ငံတော် သမ္မတနေရာကို ရရှိခဲ့တာဖြစ်ပါတယ်။
ဦးညိုစောက ဆန္ဒမဲ ၁၂၆ မဲနဲ့ ဒုတိယ သမ္မတ (၁ )နေရာကိုရရှိခဲ့ကာ ဒုတိယ သမ္မတ (၂ )နေရာကိုတော့ ဒေါ်နန်းနီနီအေးက ဆန္ဒမဲ ၂၉မဲ နဲ့ ရရှိခဲ့တာပါ။
နိုင်ငံတော်သမ္မတနဲ့ ဒုသမ္မတတွေဟာ ၂၀၀၈ ဖွဲ့စည်းပုံ အခြေခံဥပဒေ ပုဒ်မ (၆၃) အရ ဒီကနေ့ကစပြီး လွှတ်တော်ကိုယ်စားလှယ်ဖြစ်လျှင် လွှတ်တော်ကိုယ်စားလှယ်အဖြစ်မှလည်းကောင်း၊ နိုင်ငံ့ဝန်ထမ်းဖြစ်လျှင် နိုင်ငံ့ဝန်ထမ်းအဖြစ်မှလည်းကောင်း နိုင်ငံတော်သမ္မတနှင့် ဒုသမ္မတများ ရွေးချယ်တင်မြှောက်ခြင်းခံရသည့်နေ့မှစ၍ နုတ်ထွက်ပြီး သို့မဟုတ် အငြိမ်းစားယူပြီးဖြစ်သည်ဟု မှတ်ယူရမယ်လို့ ဆိုထားတာကြောင့် အရင်ယူထားတဲ့ တာဝန်တွေကနေ အနားယူရမှာ ဖြစ်ပါတယ်။
နိုင်ငံတော်သမ္မတဖြစ်လာတဲ့ ဦးမင်းအောင်လှိုင်ဟာ ယာယီသမ္မတနဲ့ ဗိုလ်ချုပ်မှူးကြီးဘဝကနေ အငြိမ်းစားယူရမှာဖြစ်သလို ဦးညိုစောဟာလည်း အရင်ယူထားတဲ့ ဝန်ကြီးချုပ်တာဝန်တွေတွေက အနားယူရမှာဖြစ်တာအပြင် သူယှဥ်ပြိုင်ခဲ့တဲ့ ကိုးကိုးကျွန်း ပြည်သူ့လွှတ်တော်နေရာဟာ လစ်လပ်သွားပြီမို့ နောင်ကျင်းပမယ့် ကြားဖြတ်ရွေးကောက်ပွဲမှာ ကိုးကိုးကျွန်းမဲဆန္ဒနယ်ဟာ ပြည်သူ့လွှတ်တော်အတွက် ရွေးကောက်ပွဲကျင်းပရမှာဖြစ်ပါတယ်။ အလားတူ ဒုသမ္မတ ဒေါ်နန်းနီနီအေး အနိုင်ရခဲ့တဲ့ ဘားယအံက အချိုးကျကိုယ်စားပြုမဲဆန္ဒနယ်ဟာလည်း လစ်လပ်သွားပြီဖြစ်ပါတယ်။
ဒီနေ့ရွေးချယ်ခဲ့တဲ့ နိုင်ငံတော် သမ္မတနဲ့ ဒုသမ္မတတွေဟာ ပြည်ထောင်စုလွှတ်တော်မှာ ကျမ်းကျိန်ပြီးရင် အစိုးရတာဝန်တွေကို ၅နှစ်တာ ထမ်းဆောင်ရတော့မှာဖြစ်ပါတယ်။
